ඔලිම්පික් පරාජය, ජයග්‍රහණය - කේ. කරුණාදාස 1964

මෙවර ඔලිම්පික් තරඟාවලියේදී (2008) අපේ ක්‍රීඩකයින්ට විශේෂ ජයග්‍රහණ රහිතවම නිමාවට පත්විය. එහෙත් සහභාගිත්වය සහ ලද අත්දැකීමුත් ඔවුන්ගේ ඉදිරි ගමනට විශාල රුකුලක් වනු නොඅනුමානය.

මා අද කතා කරන්නට යන පුද්ගලයාත් කිසිම ජයග්‍රනයක් නැතිවම, පරාජයම නිසාම මහත් ප්‍රසිද්ධියක් ලැබුවෙකි. නමින් ඔහු කේ. කරුණාදාස.

ඔහු 1964දී ජපානයේ තෝකියෝ නගරයේ පැවති ඔලිම්පික් තරඟයේ මීටර 10,000 තරඟයට සහභාගී විය. එම තරඟය ඇමරිකානු ජාතිකයෙකු විසින් ජයග්‍රහණය කරන ලදී. නමුත් ඒ වන විටත් අපේ කරූට තවත් වට 3ක් ඉතිරිව තිබුණි. කෙසේ හෝ ඔහු එයින් එක වටයක් නිමා කළේය. අනෙක් තරඟකරුවොත් තරඟය නිමා කර අවසන්ය. ක්‍රීඩා පිටියේ දැන් දුවන්නේ කරු පමනි. දෙවෙනි වටයත් නිමා කළේය. ඒ හූ හඬ මධ්‍යයේය. නමුත් කරු දිගටම දිවීම කරගෙන ගියේය. හූ හඬ නතර වූයේ නැත. කරූ අවසාන වටයට පිවිසියේය. හූ හඬ ක්‍රමයෙන් අත්පුඩියකට හැරුණි. අත්පුඩිය ජය ගෝෂාවකට පෙරළුනි. කරූ තරඟය අවසන් කළේ තරඟයේ ප්‍රථම ස්ථානය ලැබුවාක් මෙන් සංතෝෂයකිනි. මුළු ක්‍රීඩාංගනයම ප්‍රීතිගෝෂා කරන්නට විය. මාධ්‍යකරුවෝ ඔහුව වට කර ගත්තේය. තරඟයේ පළමුවැන්නා පැත්තකය.

පසුදින ප්‍රධාන පුවත්පත් සෑම එකකම වාගෙ කරූගේ ඦායාරූපයෙන් සැරසී තිබිණි. පසු කලෙක කරූගේ මේ පුංචි කතන්දරය ජපාන ළදරු පොත්වල පවා පළ කොට තිබිනි. මෙම කතාව විශ්වාස නැත්නම් මේ video එක බලන්න. නොම්මර 67 මේ අපේ කරුණාදාසයි.

(මේ කතාව මිනිසුන් එක එක විදියට කියනවා මා අසා තිබෙනවා. නමුත් මා මේ සටහන තැබුවී කාලයක් ජපානයේ විසු ජ්‍යෙෂ්ඨ ශ්‍රී ලාංකීය පුරවෙසියෙකුගෙන් ලබා ගත් තොරතුරු වලට අනුව බව සලකන්න.)